ბიზნესის როლი თემის რესოციალიზაცია-რეაბილიტაციაში

რა მნიშვნელობა აქვს სწორი საკომუნიკაციო კამპანიებს - ბიზნესის როლი თემის რეაბილიტაცია/რესოციალიზაციის პროცესში

ბიზნესის როლი მოწყვლად ჯგუფებში უთანასწორობის შესამცირებლად - ეს გახლავთ საკითხი, რომელიც თავისთავად ნარკოდამოკიდებულთა თემსაც მოიაზრებს, რადგანაც სხვადასხვა გარემოებების გამო, ეს ადამიანები ნამდვილად მიეკუთვნებიან იმ პოპულაციას, რომელთა ირგვლივაც უთანასწორო გარემოა შექმნილი. 

დღეს ბიზნესი ნარკოდამოკიდებული ადამიანების რეაბილიტაცია/რესოციალიზაციისთვის არანაირ კონტრიბუციებს არ ახორციელებს და ეს სურათი კვლავ თვალსაჩინოა, თუმცა, რამდენად მნიშვნელოვანია ამ კუთხით სწორი საზოგადოებრივი აზრის ფორმირება და შემდგომ ბიზნესის როლის გაძლიერება, აღნიშნულზე ჩვენთან რეპუტაციის მართვის კომპანია „მაინდერის“ ხელმძღვანელმა და სტრატეგიული კომუნიკაციების სპეციალისტმა, გიორგი კალატოზიშვილმა ისაუბრა.

• რა მნიშვნელობა აქვს სწორ საინფორმაციო კამპანიებს 

როგორც გიორგი კალატოზიშვილი ამბობს, ეს თემა სტიგმატიზებული ყოველთვის იქნება, თუ დროთა განმავლობაში, საკითხი საინფორმაციო ასპექტში არ გადავიყვანეთ.

„ვფიქრობ, ეს არის ყოვლის მომცველი, ძალიან კომპლექსური სამუშაოს შედეგი, დაწყებული სასკოლო, დასრულებული უმაღლესი საგანმანათლებლო შემეცნებითი პროცესებით და რაც მთავარია, მენტალური თავისებურების შეცვლა საზოგადოებაში, სადაც მოხმარება, ჯერ კიდევ მორალური ასპექტიდან განიხილება და ბოროტებად აღიქმება“, – ამბობს გიორგი კალატოზიშვილი.

იგი ხაზს კანონმდებლობის ხარვეზებსაც უსვამს და ამბობს, თუ კანონში ამდენი წელია გვიწერია, რომ ეს არის დაავადება, აბსოლუტური ნონსენსია, როცა საკუთარ კანონმდებლობასთან კონტრასტში შედიხარ, რადგან ათასობით ადამიანმა წამალდამოკიდებულების გამო სასჯელი მოიხადა.

„ესაა ძალიან დიდი აცდენა რეალობასა და ფურცელზე არსებულ  კანონმდებლობას შორის“, – მიიჩნევს სტრატეგიული კომუნიკაციების სპეციალისტი.

კალატოზიშვილის მოსაზრებით, როცა ამდენი რეპრესიული ადამიანი და მათი ოჯახები გვყავს, თუ ამ ოჯახებმა, ასევე, კონფლიქტში ჩართულმა ახლო წრემ ხმა არ ამოიღო, გარე საზოგადოებიდან მხარდაჭერაზე საუბარი, აბსოლუტური აბსტრაქციაა.

„სწორედ ეს სტიგმატიზებულები ადამიანები, რომლებიც საჯარო უწყებებში, კერძო სექტორში და ა.შ. მუშაობენ, ამავე სტიგმიდან გამომდინარე ნარკოსცენაზე არ ჩანან, ამიტომ ურჩევნიათ ჩუმად იყვნენ. ეს არის ზუსტად უხმო უმრავლესობა“, – აღნიშნავს გიორგი კალატოზიშვილი.

ამავე კონტექსტში მან ყურადღება საკომუნიკაციო კამპანიების წარმართვის საკითხზე გაამახვილა და თქვა, რომ მნიშვნელოვანია აღნიშნული წესების დაცვით განხორციელდეს, რათა კონკრეტული შედეგი მივიღოთ:

„სამიზნე ჯგუფები უამრავია – არის ნეიტრალურად განწყობილი, ვისაც უბრალოდ ინფორმაცია არ აქვს; უარყოფითად განწყობილი, მათ შორის არიან სასულიერო პირები, კონკრეტული ექიმები, არიან საჯარო უწყების წარმომადგენლები და ასევე, არის დადებითად განწყობილი ჯგუფები, როგორიცაა თემი, მომხმარებლები, მათი ოჯახები და ა.შ“, – თქვა ჩვენთან საუბრისას კალატოზიშვილმა და ამასთან, კორპორაციული პასუხისმგებლობის ფარგლებში, ბიზნესის შესაძლო ჩართულობაზე ისაუბრა.