„პარლამენტში 15-ზე მეტი კანონპროექტი გვაქვს შეტანილი, რომელიც ნარკოპოლიტიკას ეხება, თუმცა არც ერთი არ განხილულა“ - იაგო ხვიჩია „გირჩის“ გეგმებზე

დეპუტატი მიიჩნევს, რომ ნარკოპოლიტიკის მთავარი გამოწვევა საარჩევნო პოლიტიკასთან ბმაა და სანამ ეს პრობლემა იარსებებს, მანამ ცვლილებები ვერ განხორციელდება.
 

„სინამდვილეში მკაცრი ნარკოპოლიტიკა იმიტომ გვაქვს, რომ არჩევნებზე ხმების მობილიზებაა საჭირო“, - ამბობს Drugpolicy.ge-თან საუბრისას პარტია „გირჩის“ ლიდერი, იაგო ხვიჩია და საუბრობს იმ ძირითად მიზეზებზე, რის გამოც ნარკოპოლიტიკის ლიბერალიზაცია წლებია კვლავ გამოწვევად რჩება.

მისი აზრით, ნარკოპოლიტიკის მთავარი გამოწვევა საარჩევნო პოლიტიკასთან ბმაა და სანამ ეს პრობლემა იარსებებს, მანამ ცვლილებები ვერ განხორციელდება.

იაგო ხვიჩიას ნარკოპოლიტიკის ძირითად პრობლემებზე, საარჩევნო პროგრამაში „გირჩის“ პოლიტიკასა და საპარლამენტო საქმიანობის ფარგლებში, პარტიის აქტიურობაზე ვესაუბრეთ.

• ნარკოპოლიტიკა - პრობლემები და მთავარი გამოწვევა
  

„სანამ ნარკოპოლიტიკა საარჩევნო პოლიტიკასთან მიბმულია, სანამ ეს ადამიანები ხმებად გვინდა გამოვიყენოთ და ვიდრე ზეწოლა, შანტაჟი, ბერკეტია იმისა, რომ ნარკოტიკს რომელიღაც პროგრამით უფასოდ მიიღებენ, ეს პრობლემა სულ იარსებებს“, - ამბობს ჩვენთან საუბრისას იაგო ხვიჩია და უმატებს, რომ ეს არის საარჩევნო საკითხი და არჩევნებზე ხმების მობილიზების საშუალება. 

დეპუტატს ვთხოვეთ შეეფასებინა, რამდენად რეალურ შედეგად მიიჩნევს კანაფის დეკრიმინალიზაციას ნარკოპოლიტიკის ლიბერალიზაციის გზაზე და რა რჩება ამ კუთხით მოუგვარებელ პრობლემად, რაზედაც მან ასე გვიპასუხა:

„კანაფის პოლიტიკის შერბილებაც სინამდვილეში ასეთია: იმის გამო, რომ კანონში ჩანაწერი არ არსებობს, სახელმწიფომ არ დატოვა მექანიზმი, რომ სოფლებში დრონები არ ეფრინათ და ვის სახლშიც კანაფი იყო, სისხლის სამართლის საქმე არ აღეძრათ, შემდეგ კი ეთქვათ, რომ „ქოცებს“ თუ არ შემოხაზავ, ახლა დაგიჭერ.

ამდენად, გააჩნია ამ საკითხს რას შევადარებთ, თუ სასამართლოს გადაწყვეტილების შემდეგ (კანაფის მოხმარებაზე სსრკ პასუხისმგებლობის ჩამოცილება) პროცესს შევადარებთ, მაგის შემდეგ არაფერი შეცვლილა.

ხალხს ისევ ისე აწვალებენ, ლეგალური მცენარის, კანაფთან დაკავშირებული დანაშაულის გამო, ისევ ციხეში სხედან“, - აღნიშნა იაგო ხვიჩიამ.

როგორც მანვე გვითხრა, „გირჩს“ პარლამენტში რამდენიმე კანონპროექტი აქვს შეტანილი და მათ შორისაა, კანაფის ლეგალიზაციასთან დაკავშირებული პროექტი, რაც ნიშნავს, რომ კანაფთან დაკავშირებული ნებისმიერი ტრანზაქცია, იქნება ეს კულტივირება თუ გაყიდვა და ა.შ, სისხლის სამართლისა და ადმინისტრაციული კოდექსიდან ამოიღონ. 

„კანაფთან დაკავშირებით სხვანაირი რეგულირება უნდა დავიწყოთ, დაახლოებით სიგარეტისა და ალკოჰოლის მსგავსი. სწორედ ამის შესახებ გვაქვს კანონპროექტი შეტანილი“, - თქვა ხვიჩიამ.
 

• განუხილავი კანონპროექტები და „გირჩის“ გეგმები
  
  

დეპუტატის თქმით, გარდა კანაფთან დაკავშირებული კანონპროექტისა, „გირჩს“ პარლამენტში, კიდევ რამდენიმე პროექტი აქვს ინიციირებული. მათ შორის სხვა ნარკოტიკებზე, სისხლის სამართლის კოდექსიდან მათი ამოღების კანონპროექტი. მზადდება კანონპროექტი ამნისტიაზეც, თუმცა, უკვე რეგისტრირებული პროექტები, როგორც ხვიჩიამ გვითხრა, ამ დრომდე არ განუხილავთ.

იაგო ხვიჩია ასევე ხაზს უსვამს ოდენობების შესახებ არსებულ პრობლემასაც და ამბობს, რომ ეთანხმება ყველა ნარკოტიკზე ოდენობების გაზრდას:

„ჩვენ არ მივიჩნევთ, რომ რაიმე ოდენობა არსებობს, ვინც განსაზღვრავს, რამდენის გამო უნდა ჩასვან ადამიანი ციხეში. ვერ ვხვდები, 4 ბოცა არყის გამო ხომ არ უნდა ჩავსვათ ადამიანი ციხეში? ვიღაც თუ 4 ბოცა არყის შესაბამისი ნარკოტიკული საშუალება აქვს, რომელსაც ის მოიხმარს, ის ციხეში როგორ უნდა ჩავსვათ?“, - ამბობს იაგო ხვიჩია.

„გირჩის“ ლიდერს ვკითხეთ, რას აკეთებს პარტია საპარლამენტო ტრიბუნიდან საიმისოდ, რომ მოცემულობა შეიცვალოს, რაზედაც მან გვიპასუხა:

„საქმე ისაა, რომ ჩვენს შეტანილ კანონპროექტებს „ქოცები“ არ იხილავენ. წარმოიდგინეთ, შევიტანეთ კანონპროექტი 2021 წლის მიწურულს, 2022 წლის საგაზაფხულო და 2023 საშემოდგომო სესიებზე.. ახლაც შემაქვს, არც ერთი მათგანი განხილული არ არის. 

ჯამში 15-ზე მეტი კანონპროექტი გვაქვს შეტანილი, რომელიც ნარკოპოლიტიკას ეხება, თუმცა შედეგზე უკვე გითხარით, რაც არის. არც ერთი არ განხილულა, ან რომელიმე კომიტეტმა განიხილა და რაღაც თვეებით ისევ გადადო.

ბიუროს სხდომებზე, თვეში ერთხელ მაინც, ჩემი გამოსვლისას ვამბობ, რატომ არ იხილავთ ჩვენს კანონებს“, - გვითხრა დეპუტატმა.

ხვიჩიას მოსაზრებით, საზოგადოების გარკვეულ ნაწილზე სახელისუფლებო და მედიაპროპაგანდაც მუშაობს. ამბობს, რომ არ უნდა დაგვავიწყდეს ოპოზიციაც, რომელიც იმავე აზრზეა და მისი პოზიციონირება არსად არ ჩანს. 

„საჯარო პოლიტიკაში მათი (ოპოზიციის) პოზიციაა, რომ არ აწყობთ ლიბერალიზაცია, რადგან ხალხზე პროპაგანდა, საარჩევნო ბერკეტებზე და ზეწოლაზე ნამუშევარია და ეს ყველაფერი ერთმანეთთან გადაჯაჭვულად ბმაშია.

მათ შორისაა, ჩვენი შინაგან საქმეთა სამინისტროს სისტემაც, რომელიც სუს-ის მიერ ხალხზე ზემოქმედების ბერკეტია. როგორც გითხარით, ესაა ჩვეულებრივი საარჩევნო პოლიტიკის ამბავი“, - ამბობს ხვიჩია.

მისი მოსაზრებით, სწორედ ამიტომაა, რომ საღი აზრი არასდროს იმარჯვებს, არამედ იმარჯვებს უმრავლესობის აზრი, რომელმაც არ იცის სისტემა.

„ეს დაახლოებით იმას ჰგავს, ხალხი წყვეტდეს პაციენტს ოპერაცია უნდა გაუკეთდეს თუ არა და თანაც ის ხალხი, რომელსაც არ ოპერაციაზე და არც პაციენტის დაავადებაზე, წარმოდგენა არ აქვს“, - დასძენს იაგო ხვიჩია.

• იქნება თუ არა „გირჩის“ საარჩევნო პროგრამაში ნარკოპოლიტიკა