ახალი წლის სადღესასწაულო დღეებში დრამატულად იზრდება ფსიქოაქტიური ნივთიერებების მოხმარების შემთხვევები.

 

გამოცდილება და კვლევები ადასტურებს, რომ ახალი წლის სადღესასწაულო დღეებში დრამატულად იზრდება ფსიქოაქტიური ნივთიერებების მოხმარების შემთხვევები. მათ შორის, წამყვან ადგილს ალკოჰოლური სასმელი იკავებს. ალკოჰოლის მიღება გავლენას ახდენს ადამიანის განსჯისა და შეფასების უნარზე, ართულებს იმპულსების კონტროლს და ზრდის სარისკო ქცევის ალბათობას, აქედან გამომდინარე, საახალწლო დღეებში ხშირია ალკოჰოლთან ერთად სხვა ფსიქოაქტიური ნივთიერებების მოხმარების ფაქტებიც. 

 საყურადღებოა, რომ ალკოჰოლთან ერთად სხვა ფსიქოაქტიური ნივთიერების მოხმარებამ შესაძლოა ადამიანს მძიმე და გამოუსწორებელი ფიზიკური და ფსიქიკური ზიანი მიაყენოს. ალკოჰოლთან ერთად ნარკოტიკული საშუალებების მოხმარება ზრდის ზედოზირების, კომისა და ფატალური გამოსავლის რისკებს. აღნიშნული დამოკიდებულია როგორც ნივთიერების სახეზე, ასევე მის დოზასა და მომხმარებლის ქცევაზე.

იმ პირებს, რომლებიც ახალი წლის დღეებში შესაძლოა აღმოჩნდნენ ალკოჰოლური სასმელებისა და სხვა ფსიქოაქტიური ნივთიერებების მოხმარების წამახალისებელ გარემოში, გთავაზობთ რისკის ცხრილს.  იხ: https://cpr.ge/drugs/risk?fbclid=IwAR2KJdvfx5-DY1iVX1QttIQWZ3fG2FvEHTRsL8xGrO16ZxKPlMHjsyzXEMQ

ცხრილში აღწერილია ფსიქოაქტიური ნივთიერებების სხვადასხვა კომბინაციის შესაძლო რისკები და საფრთხეები. აღნიშნული ცხრილი სასარგებლო ინსტრუმენტია ზიანის შემცირების ორგანიზაციებისთვის, ასევე, ფსიქოაქტიური ნივთიერებების მომხმარებელ პირთათვის, მათი ოჯახის წევრებისთვის და ახლო გარემოცვისთვის. 

ცხრილით სარგებლობისთვის აირჩიეთ ის ორი ფსიქოაქტიური ნივთიერება, რომელთა კომბინაციაზეც გსურთ ინფორმაციის მიღება.

 გაითვალისწინეთ, რომ ცხრილი წარმოადგენს სწრაფ ინსტრუმენტს და არ გაწვდით ამომწურავ ინფორმაციას ფსიქოაქტიური ნივთიერებების კომბინაციაში მოხმარების ან მათი დოზირების შესახებ. ამისათვის აუცილებლად დაგჭირდებათ დამატებითი ინფორმაციის მოძიება. 

   იმ პირებს, ვინც საახალწლო დღეებში გეგმავთ ალკოჰოლური სასმელების ან სხვა სახის ფსიქოაქტიური ნივთიერებების მოხმარებას, მოგიწოდებთ, გამოიჩინოთ მაქსიმალური პასუხისმგებლობა და სიფრთხილე, ხოლო საჭიროების შემთხვევაში, აუცილებლად ითხოვოთ დახმარება!

 

წყარო: ევროკავშირის პროექტის ,,ზრუნვა, პრევენცია და ადამიანის უფლებები” (CPR) ვებ-გვერდი