ზიანის შემცირება, როგორც შეუქცევადი და სიცოცხლისთვის საშიში დაზიანებების რისკის თავიდან აცილების გზა

ნარკოპოლიტიკის ლიბერალიზაციის უკუსვლასთან ერთად, ქვეყანაში ნარკომომხმარებელთა პრობლემები ისევ იზრდება და მიუხედავად არასამთავრობო თუ სათემო ორგანიზაციების მცდელობისა, შეამცირონ მომხმარებლებში ზიანი, დღეს არსებული მოცემულობით, ვითარება ოდნავ შეცვლილი, თუმცა, კვლავ არასახარბიელო რჩება.

• ზიანის შემცირება საზოგადოებრივი ჯანდაცვის სფეროს განეკუთვნება, თუმცა რეპრესიული ნარკოპოლიტიკისა და სტიგმატიზებული მიდგომების გამო, მაინც ხშირია შემთხვევები, როდესაც ნარკომომხმარებლები პროგრამებში ჩართვაზე უარს ამბობენ.
• აქვე უნდა აღნიშნოს, რომ კონცეფცია „ზიანის შემცირება“ სათავეს ჯერ 80-იანი წლებიდან იღებს, როცა ბრიტანეთის ჰეროინის მოხმარების ეპიდემიასა და HBVინფექციის გავრცელებას ებრძოდა. 7 მაისს კი, მსოფლიომ ზიანის შემცირების საერთაშორისო დღე აღნიშნა.
• ზიანის შემცირება საზოგადოებრივი ჯანდაცვისა და სოციალური პროგრამების კომპლექსური მიდგომაა, რაც ნარკოტიკების მომხმარებელ ადამიანს მოხმარების შედეგად გამოწვეულ ზიანს უმცირებს.
• ზიანის შემცირება შეიძლება მოიცავდეს რამდენიმე მიმართულებას, მათ შორის, მომხმარებლებისთვის სტერილური საინიექციო საშუალებების მიწოდებას [შპრიცების დარიგება], რითაც მცირდება ინფექციური დაავადებების გავრცელების რისკი.
• ამასთან, მნიშვნელოვანია საინფორმაციო ველი და გარემო, რომლის საშუალებითაც ნარკოდამოკიდებულ ადამიანებს შეუძლიათ მშვიდ და უსაფრთხო გარემოში მოიხმარონ ნარკოტიკული საშუალება. 
• ამით მცირდება შეუქცევადი, სიცოცხლისთვის საშიში დაზიანებების რისკი, მაგალითად ისეთი, როგორიცაა: ზედოზირება. 

საქართველოში ზიანის შემცირება არსებითად ცე ჰეპატიტისა და აივ ინფექციის გავრცელების პრევენციის ზომად განიხილება, თუმცა პროგრესული მიდგომა ბევრად უფრო მრავალმხრივია.

ჯანმოს განცხადებით, მსოფლიოში 11 მილიონი ადამიანი ნარკოტიკულ საშუალებებს ინიექციის გზით იღებს. ინიექცია კი აივ ვირუსის გავრცელების ერთ-ერთ მთავარ გზას წარმოადგენს. მსოფლიო ჯანდაცვის ორგანიზაციის თანახმად, 8-იდან 1 მომხმარებელი აივ ვირუსითაა დაავადებული.

აივ ვირუსის გავრცელება მნიშვნელოვან გამოწვევას წარმოადგენს როგორც მსოფლიოს ჯანდაცვის სისტემებისათვის, ასევე ეს პრობლემა აქტიურად განიხილება საქართველოშიც.

საქართველოს ინფექციური პათოლოგიის, შიდსისა და კლინიკური იმუნოლოგიის ცენტრის ინფორმაციით, 2021 წლისთვის ქვეყანაში 9 124 აივ ინფიცირებული პირი იყო რეგისტრირებული, რომელთა 35.5% ნარკოტიკებს ინიექციური გზით მოიხმარდა.

ვირუსის გავრცელების პრევენციის მიზნით, საქართველოში მოქმედებს „ნარკოტიკების ინიექციური მომხმარებლებისთვის აივ პრევენციული სერვისების მიწოდების“ პროგრამა, რაც გულისხმობს მომხმარებლისთვის სტერილური შპრიცებით უფასო უზრუნველყოფას, რათა არ მოხდეს სიცოცხლისთვის საშიში ინფექციური დაავადებების გავრცელება.

ზიანის შემცირების პროგრამების განხორციელებაში დიდი როლი მიუძღვის თემაზე მომუშავე არასამთავრობო სექტორს, რომელთა დიდი ნაწილი აქტიურად ახორციელებს შპრიცების დარიგების პროგრამას და მნიშვნელოვნადაა ჩართული ყველა სხვა კამპანიებში.