„ყველა რეპრესიული მიდგომა ფიასკოთი დასრულდა“ – 10 წელზე მეტი ზიანის შემცირების კვალდაკვალ

ზიანის შემცირების სტრატეგია და ნარკომომხმარებლების სხვადასხვა პროგრამებში ჩართვა რომ სასიცოცხლოდ მნიშვნელოვანი საკითხია, დღეს ამაზე აღარავინ დავობს. შესაბამისად, მნიშვნელოვანია ამ პროცესში თავად სათემო ორგანიზაციებისა და არასამთავრობო სექტორის როლი, რომელიც 10 წელიწადზე მეტია სხვადასხვა გზებით ცდილობს შეამციროს ზიანი ნარკოდამოკიდებულ ადამიანებში.

ასევე ხაზგასასმელია, ამ საკითხებზე საზოგადოებრივი ცნობიერების ამაღლება, რაშიც უდიდესი როლი მედიას აკისრია. სწორედ ამიტომ, დღევანდელ პუბლიკაციაში ზიანის შემცირების სტრატეგიასა და ამ დროისთვის ქვეყანაში არსებულ ვითარებაზე „ზიანის შემცირების საქართველოს ქსელის“ მედია კოორდინატორი, მარინა ასათიანი ისაუბრებს.

მარინა ასათიანი არასამთავრობო ორგანიზაცია „ზიანის შემცირების საქართველოს ქსელს“, რომელიც ასევე 24 ორგანიზაციას აერთიანებს, მრავალი წელია წარმოადგენს და როგორც თავად ამბობს, ამ გზის გავლა მარტივი არ ყოფილა.

გვიყვება, რომ ზიანის შემცირების სტრატეგიას 2002 წლიდან ეზიარა, როცა მან, მისმა მეგობრებმა და თანამოაზრეებმა არასამთავრობო ორგანიზაცია „ახალი გზა“ დააფუძნეს.

• მარინა ასათიანი - გზა ზიანის შემცირებამდე და ბრძოლა ლიბერალური ნარკოპოლიტიკისთვის

„იქიდან მოყოლებული ზიანის შემცირების სტრატეგიასა და პროგრამებზე ფიქრი და შემდგომ მის პრაქტიკაში დანერგვაზე მუშაობა დავიწყეთ. თუმცა, აქვე მინდა აღვნიშნო, რომ საამისოდ ჩვენ ლიბერალური ნარკოპოლიტიკა გვჭირდებოდა -  ასევე საჭირო იყო, რომ საზოგადოებას ზიანის შემცირების შესახებ სწორი ინფორმაცია მიეღო.

ყველაზე მნიშვნელოვანი კი ის გახლდათ, რომ ამ პროცესში თავად თემი უნდა გამოჩენილიყო და ამ საკითხებზე თავად უნდა ესაუბრათ. ელაპარაკათ თავიანთ უფლებებზე და იმ შესაძლებლობებზე, რაც მათთვის ყველაზე მნიშვნელოვანი იყო.

მოგეხსენებათ, მაშინ ამ კუთხით ძალიან რთული ვითარება იყო ზიანის შემცირების მომხრეებს ნარკოტიკების მოხმარების წახალისებაში გვადანაშაულებდნენ, რაც ძალიან დიდი ხელის შემშლელი ფაქტორი იყო. თუმცა, მიუხედავად ყველაფრისა, ჩვენ ამ გამოცდებს გავუძელით და 2004 წელს ძალიან წარმატებული პროექტი განვახორციელეთ.

ეს იყო მედიაკამპანია, რაც მინდა ხაზგასმით აღვნიშნო, რადგან მედიის როლი ამ პროცესში ძალიან მნიშვნელოვანია. ჩვენ გაგვიჩნდნენ თანამოაზრეები, ჩავატარეთ ბევრი „ტრენინგი“; სემინარი და საინფორმაციო ღონისძიება, რამაც სწორი ინფორმაციის გავრცელებას შეუწყო ხელი.

როცა თანამოაზრეებსა და მხარდამჭერებზე ვსაუბრობ, მინდა აუცილებლად გავუსვა ხაზი „ღია საზოგადოება - საქართველოს“ ფონდს, რომელიც ამ ყველა პროექტის განხორციელებაში დაგვეხმარა. 

დროთა განმავლობაში შეიქმნა სათემო ორგანიზაციები - „ახალი ვექტორი“ და „რუბიკონი“, „ფენიქსი 2009“ და სხვა, შედეგად კი, ყველამ ერთად, დავიწყეთ ბრძოლა  ნარკოპოლიტიკის ლიბერალიზაციისა, რაც სხვადასხვა კამპანიებში, ღონისძიებებში, საპროტესტო აქციებისა თუ შეკრებებში აქტიური ჩართულობით დღემდე გრძელდება“, - ამბობს მარინა ასათიანი და ხაზს უსვამს ზიანის შემცირების პროგრამების მთავარ მიზანსა და არსს:

„ზიანის შემცირების ძირითადი მიზანი ისაა,  რომ მოახდინოს ნარკომომხმარებლებში B და C ჰეპატიტის, ტუბერკულოზის, აივ ვირუსისა და სგგი-ს გავრცელების პრევენცია და ზედოზირებით გამოწვეული სიკვდილიანობის რაოდენობის შემცირება.

ამდენი წლის შემდეგ, მე ასე ვიტყოდი:  ფაქტობრივად  ნარკოტიკებთან ომი წაგებულია,  სადამსჯელო პოლიტიკამ არანაირი შედეგი არ გამოიღო. 

სწორედ ამიტომ, მნიშვნელოვანია ზიანის შემცირების სტრატეგია, რომელიც შესაძლებლობას აძლევს ადამიანებს, შეამცირონ მავნე ნივთიერების  მოხმარების შედეგად საკუთარი თავისთვის,  გარემოსთვის მიყენებული ზიანი, გახდნენ საზოგადოების სრულფასოვანი წევრები. საბოლოო ჯამში, ზიანის შემცირების პროგრამებმა ძალიან ბევრი ადამიანი გადაარჩინა.

აქ მინდა კიდევ ერთხელ ხაზი  გავუსვა თემის როლს, რომელმაც მნიშვნელოვანი წვლილი შეიტანა C ჰეპატიტის ელიმინაციის პროგრამის განხორციელებაში  - ჩვენ ყველაფერი გავაკეთეთ იმისათვის, რომ C ჰეპატიტის ელიმინაციის პროგრამა განხორციელებულიყო და ამ კონტექსტშიც, თემისა და ზიანის შემცირების სტრატეგიამ წარმატებულად იმუშავა“. - ამბობს მარინა ასათიანი.

ავტორი: სალომე სარიშვილი