,,ჩვენ არ დავიცდით“ -ჰეპატიტების მსოფლიო დღე

ჰეპატიტების მსოფლიო დღე  ყოველწლიურად  28 ივლისს აღინიშნება და საშუალებას აძლევს მსოფლიოს, გაერთიანდეს საერთო მიზნის მისაღწევად, რათა შემცირდეს ვირუსული ჰეპატიტების გლობალური ტვირთი და ამაღლდეს მოსახლეობის ცნობიერება.

მიმდინარე წელს, ჰეპატიტის მსოფლიო დღის სლოგანია - ,,ჩვენ არ დავიცდით“ ‘We’re Not Waiting’ 

,,ჩვენ არ დავიცდით“ გლობალური კამპანიაა, რომელიც მსოფლიოში მთელ საზოგადოებას გააერთიანებს და მოუწოდებს ქვეყნებს დააჩქარონ  ჰეპატიტის აღმოსაფხვრელად მიმართული ძალისხმევა. კამპანია  ხაზს გაუსვამს სოციალურ უთანასწორობას და უსამართლობას, რომელიც გამოწვეულია ჰეპატიტის აღმოსაფხვრელად არსებული ქმედებების ნაკლებობით და ფოკუსირებული იქნება პოზიტიურ ქმედებებზე, რომლებიც2030 წლის ელიმინაციის მიზნების მისაღწევად არის საჭირო.

მსოფლიოში შეფასებითი რიცხვით დღეისათვის 354 მილიონი ადამიანი ცხოვრობს ვირუსული ჰეპატიტით და დაახლოებით 1 მილიონი კვდება მისი გართულების - ღვიძლის კიბოსა და ციროზის მიზეზით.

საქართველოსთვის ვირუსული ჰეპატიტების მართვამ განსაკუთრებული მნიშვნელობა შეიძინა, რადგან 2015 წლიდან ქვეყანაში ამოქმედდა C ჰეპატიტის ელიმინაციის სახელმწიფო პროგრამა, რომელიც თავისუფლად შეიძლება ჩაითვალოს ჯანდაცვის სფეროში ფლაგმანად თავისი რეალური დადებითი შედეგებით და ათაიათასობით გადარჩენილი სიცოცხლით. ამ პროგრამამ იტვირთა ლოკომოტივის როლი და მნიშვნელოვნად გააუმჯობესა B ჰეპატიტისა და აივ ინფექციის გამოვლენა გაერთიანებული სკრინინგული ტესტირების გზით.  პრევენციული ვაქცინაციისა და მართვის სხვა კომპონენტის სრულყოფით C ჰეპატიტთან ერთად რეალური ხდება B ჰეპატიტის ელიმინაციის მიღწევა საქართველოში. 

ქვეყანაში მიმდინარე C ჰეპატიტის ელიმინაციის პროგრამის შეფასების, ასევე B და C ჰეპატიტების გავრცელებისა და რისკ-ფაქტორების შესწავლის მიზნით, CDC-ის მხარდაჭერით, 2021 წელს საქართველოში ჩატარდა SARS-CoV-2-ისა და ვირუსული B და C ჰეპატიტების სეროპრევალენტობისა და რისკის ფაქტორების პოპულაციური კვლევა. კვლევის მონაცემებით, მოზრდილ მოსახლეობაში C ჰეპატიტის აქტიური შემთხვევების გავრცელებამ 1.8% შეადგინა, ხოლო ბავშვებში შემთხვევები არ დაფიქსირებულა. 6 წლის მანძილზე ქრონიკული C ჰეპატიტის გავრცელებამ 67%-ით იკლო (5.4% 2015 წელს და 1.8% 2021 წელს). კვლევამ შთამბეჭდავი შედეგი აჩვენა B ჰეპატიტის მხრივაც. ტესტირებულთა შორის  ბავშვებში B ჰეპატიტის მხოლოდ ერთი შემთხვევა დადასტურდა (0,03%), რაც ვაქცინაციის პროგრამის წარმატებულ მიმდინარეობაზე მიუთითებს.                      

ჰეპატიტის ელიმინაციის პროგრამა საქართველოში არის გლობალური ჯანმრთელობისთვის მაგალითი, რომელიც აჩვენებს პარტნიორობის, პოლიტიკური მხარდაჭერის, ინვესტიციებისა და საზოგადოებრივი ჯანდაცვის ქსელის გაძლიერების მნიშვნელობას ელიმინაციის პროგრამების წარმატებაში. იმედს ვიტოვებთ, რომ საქართველო იქნება ერთ-ერთი პირველი ქვეყანა, რომელიც მიაღწევს C ჰეპატიტის ელიმინაციას. ზიანის შემცირების საქართველოს ქსელი  უერთდება გლობალურ კამპანიას ,,ჩვენ არ დავიცდით“ და ქვეყნის მასშტაბით ღონისძიებებს გამართავს.

#WHD #NotWaiting #HepCantWait #WHDRelay 

C ჰეპატიტის ელიმინაცია საქართველოში

 http://test.ncdc.ge/Handlers/GetFile.ashx?ID=382fda04-aadf-4a72-b408-70fae775365a