საქართველოს ნარკოპოლიტიკის ტენდენციები

3 აგვისტოს, სოციალური სამართლიანობის ცენტრმა  სასტუმრო „ქორთიარდ მერიოტში “ ნარკოპოლიტიკა საქართველოში: 2022 წლის ტენდენციები - პრეზენტაცია გამართა. პუბლიკაცია შექმნილია სოციალური სამართლიანობის ცენტრის მიერ, ევროკავშირის მხარდაჭერით მიმდინარე პროექტის, „სამოქალაქო საზოგადოებისა და პროფესიული ორგანიზაციების გაძლიერება საქართველოში უსაფრთხო, დაცული და ანგარიშვალდებული საზოგადოების უზრუნველსაყოფად“ და გლობალური ფონდის ფინანსური მხარდაჭერით მიმდინარე, ევრაზიის ზიანის შემცირების ასოციაციის მიერ გამოცხადებული ქვე-გრანტების პროგრამის, „მდგრადი სერვისები აღმოსავლეთ ევროპისა და ცენტრალური აზიის ქვეყნების რეგიონის სამიზნე მოსახლეობისთვის“ ფარგლებში. შეხვედრას სამთავრობო და არასამთავრობო, საერთაშორისო, სათემო ორგანიზაციების წარმომადგენლები  ესწრებოდნენ. 

შეხვედრის მონაწილეებს მისასალმებელი სიტყვით მიმართეს სოციალური სამართლიანობის ცენტრის მართლმსაჯულებისა და დემოკრატიის პროგრამის დირექტორმა გურამ იმნაძემ და  საქართველოში ევროკავშირის დელეგაცის პროგრამის ოფიცერმა ლალი ჩხეტიამ.

წარმოდგენილი იყო შემდეგი პრეზენტაციები: ნარკოპოლიტიკა საქართველოში: 2022 წლის ტენდენციები - თამარ ფაჩულია, სოციალური სამართლიანობის ცენტრი; ნარკოპოლიტიკის სახელმძღვანელო პრინციპები აღმოსავლეთ ევროპისა და ცენტრალური აზიის რეგიონის ქვეყნებისთვის- მარი ჩოხელი, ეროვნული ექსპერტი, აღმოსავლეთ და ცენტრალური ევროპისა და ცენტრალური აზიის ნარკოპოლიტიკის კომისია; ფსიქოაქტიური ნივთიერებების მოხმარება საქართველოს ზოგად მოსახლეობაში - ირმა კირთაძე, დამოკიდებულებების კვლევითი ცენტრი „ალტერნატივა ჯორჯია“; ნარკოტიკული საშუალებების ხარისხის შემოწმება (Drug-Checking): მიღწევები და გამოწვევები- თემო ხატიაშვილი, საზოგადოებრივი ორგანიზაცია „მანდალა“.

 შეხვედრაზე აღინიშნა, რომ დღეს ნარკოპოლიტიკის თემას, პოლიტიკურ ჭრილში, დაკარგული აქვს აქტუალობა- სახელმწიფოს არ აქვს ხედვა ნარკომანიასთან დაკავშირებული პრობლემების გადაჭრაზე, საქართველოში მოქმედი ნარკოკანონმდებლობა კვლავ სადამსჯელო ღონისძიებებისა და მიწოდების შეზღუდვისკენაა მიმართული. ასევე ხაზი გაესვა ნარკოპოლიტიკის ძირეული რეფორმის განხორციელების აუცილებლობას, რომელიც სადამსჯელო ღონისძიებების ნაცვლად მიმართული იქნება ადამიანის ჯანმრთელობის დაცვის ხელშეწყობისა და პრევენციული ღონისძიებების გატარებისკენ. ორგანიზაციის განცხადებით დღის წესრიგში დგას საკანონმდებლო ცვლილებების განხორციელების, მათ შორის, საკონსტიტუციო სასამართლოს გადაწყვეტილებების კანონმდებლობაში ასახვის აუცილებლობა და საჯარო უწყებების მიერ არასრულყოფილი სტატისტიკის წარმოების პრობლემა.

 შეხვედრამ საკმაოდ პოზიტიურად და პროდუქტიულად ჩაიარა.  დაბოლოს მხარეებმა მზაობა გამოთქვეს სამომავლო თანამშრომლობის გასაგრძელებლად